من أصعب المعارك مع نفسك اليأس

ودي مرحله أخيرة أتمنى محدش يوصلها طول مافيك نفس وطول مافيك روح يبقا ربنا لسه هيستعملك للخير ولإعمار الكون .. طول عمرك بتغلط وهتفضل تغلط لأن كل ابن آدم خطاء .فلو فاكر انك يأست من رحمة ربنا بسبب ذنوبك تبقا غلطان ..لأنك مهما غلطت هتلف وترجع تخبط على باب ربنا هتلاقيه مفتوح ..طول مالشمس بتشرق من مشرقها لسه باب التوبه والرجوع مفتوح..
أما لو يأسك بسبب الحياه والضغط والشغل فدائما قارن نفسك بنفسك القديمه..ناس كتير في جلسات تحليل نفسي تتكلم معاهم تلاقيهم وصلوا لليأس لأنهم حاسين أنهم معملوش حاجه ومنجحوش وتلاقي في الآخر أنه شخص أنجز كتير لكن وصل لكده لأنه عمال يقارن بينه وبين غيره
ربنا لما قال كف عينك عن رزق غيرك ترزق مكانتش من فراغ ..طول مانت باصص فإيد غيرك عمرك ماهتحس بالنعمه اللي فإيدك ..تلاقي حد باصص لصاحبه اللي بقا مدير وناسي أن المدير دا نفسه يتجوز ومحصلش نصيب واللي بيبص عليه متجوز وعنده بدل الطفل اتنين..لو اقتنعنا أن مش لازم الحياة تمشي زي محنا عايزين هنرتاح كتير ...لو اقتنعنا أن ربنا بيرزقك بالاصلح ليك اللي مش هيفتنك ولايضيعك هنقول الحمد لله..(وإن شكرتم لأزيدنكم)
مهما حصلك من معارك في الدنيا ..تفتح عينك الصبح تكون ممتن أنك بتشوف ..انك بتمشي ..انك لسه عايش وعندك فرصه ترجع وتتوب 
ربنا حنين ..لو يأست من الناس كلها..خليك ماسك في ربنا ..ربنا حنين أوي ..ترتيباته لينا جميله أوي..ومهما ابتلانا عشان يسمع صوتنا بيعدي الوقت وبتعرف أن الابتلاء دا رفعك درجات ووداك لطريق أجمل مكنتش تتخيل انك تروحله 
في حكمة بحبها اوي : لا تتمادى في إقفال عينيك من الحزن والأسى فربما تتجاوز من أمامك فرحة ولا تراها.
دي حقيقيه جدا ..في ناس بتدفن نفسها في مشاعر اليأس والإكتئاب وتفوت فرص كتير أوي ومتشوفهاش وهي قافله على نفسها ومقتنعه أن دي النهايه ..
كل ماتفتكر أن هي دي النهايه افتكر الجمله دي
لا تنس أن وضعك الحالي ليس وجهتك النهائية؛ فالأفضل لم يأت بعد

ربنا يجعل نهايتنا خير وحسن خاتمة جميعا