من أصعب المشاعر على نفسية الإنسان هو الصبر..

• الصبر على ابتلاء محدش حاسس بيك فيه لأن محدش مكانك ..فبتسمع نصايح وتصبير وكلام الدنيا كلوا ساعتها بيكون ضلمه فعينك..لأن فعلا محدش حاسس بعصرة قلبك غيرك.
• الصبر على مالم تحط به علما..حقيقي صعب أوي تصبر على ابتلاء قوي وممتد ومش عارف هينتهي امتى أو حتى بعد هيحصل ايه أو بكرا مخبي إيه..أو ايه حكمة ربنا منه..
• الصبر على مرض وفلوس الدنيا كلها مش بتعملك حاجه ومفيش في إيدك وإيد كل اللي بيحبوك غير الدعاء
• الصبر على ظلم وغدر أقرب الناس ليك ودا بيبقا كأنه سكينه فقلبك بتفضل معلمه العمر كله وبتصيب الإنسان بخيبة أمل وأزمه ثقه كبيره
• الصبر على الابتلاء في الأبناء و الأهل
• الصبر على شتات أمرك والتوهه اللي بتحصل كل فتره وبتقف مع نفسك تقول يارب هل أنا ظالم ولا مظلوم وهل هنا عالطريق الصح ولا غلط

الأكيد واليقين الوحيد اللي بيصبر الإنسان حجاتين ملهومش تالت
الأولى : استشعار أن ربنا وحشه صوتك وابتلاك عشان يسمع تضرعك ودعائك ولجوئك ليه
الثانيه : تخليك متأكد أن وله في ذلك حكم وان بكرا دا بتاع ربنا والايام هتعدي هوا وتعرف ليه ربنا عمل كدا ...وهتعرف فعلا يعني ايه لو علمتم مافي الغيب لاخترتم الواقع..الوقت اللي نمت دموعك على خدك وضاق صدرك وقت الابتلاء كان ربنا بيبعد عنك شر محقق كان ممكن يكون سبب هلاكك وابتلاءك في نفسك ودينك وفي المستقبل لما تعرف الحكمه من ابتلاء ربنا هتسجد شكر

ويقول الحق تبارك وتعالى: «وَلَنَبْلُوَنَّكُمْ بِشَيْءٍ مِنَ الْخَوْفِ وَالْجُوعِ وَنَقْصٍ مِنَ الْأَمْوَالِ وَالْأَنْفُسِ وَالثَّمَرَاتِ وَبَشِّرِ الصَّابِرِينَ»
يعني كل منا مبتلى ولكن بدرجات. المهم اننا دائما ندفع البلاء بعبادة الدعاء و نتفائل و مانستعجلش الهم لأن في ناس بتستعجل البلاء بالغم قبل مايحصل ولكن ينزل الله اللطف مع البلاء فيطبطب عليك تخيل بقا لما تستعجل البلاء وتختبرة منغير لطف !!؟
ربنا يرزقنا ويرزقكم الصبر والتفاؤل و حسن الظن بالله ولا نرى فينا ولا في أهلنا وأبنائنا الا مايرضي الله 
#نورهان_شاهين