ماذا بعد التخطي؟!!
كلنا بنسأل نفسنا السؤال دا بعد كل تجربه سيئه بنعديها..
وبعدين؟!!!
مشاعر كتير متضاربه وأسئله عكس بعضها.تتراوح بين ..الأحباط والرغبة في التغيير..الوهن والقوه..الرغبة في الانجاز وحياتك تتحرك وانك مش قادر تعمل حاجه وواقف في مكانك..
وتلاقيك بتسأل نفسك معقوله أنا هونت عليه؟!!
معقوله أنا أستاهل كل دا بعد اللي عملته؟!
الحقيقه انك مش لازم تسأل نفسك كل دا
ولا تضطر تلجأ لميكانيزم التبرير لتخفيف الألم النفسي اللي انت حاسس بيه واللي للأسف أسوأ حاجه ممكن تعملها انك تبرر لحد أذاك الأذيه دي ..أو تقول لا أكيد بيحبني بس هو مش قصده..هو أكيد مضغوط
الحقيقه ان مفيش أي مبرر للأذيه ولا أن شخص يخليك تسأل نفسك هو أنا وحش أوي كدا؟!!
طب أنا مستاهلش أتحب ؟!!
اللي بجد مش بناخد بالنا منه أن لولا خروج ناس سامه ومؤذيه من حياتنا مكناش اكتشفنا القوه اللي جوانا
تخيل كدا تعيش حياتك جنب حد مؤذي كل مايشوفك بتطور يحطمك ..كل مايشوفك مبسوط ينكد عليك
مخلص عليك وعلى طاقتك ونفسيتك أول بأول ..تخيل بقا لما الشخص دا يطلع من حياتك وتفوق ..هتكتشف أن كان في حاجات كتير أوي وتطوير لذاتك كان ممكن تعمله بس انت اتلهيت في الألم النفسي وانشغلت مع حد مؤذي
شتتك وأخر تطورك واتغذى على روحك..
عشان كدا أنا بعتبر مرحله ما بعد التخطي مرحله مفصليه جدا ..يا تطلع لقدام بسرعه الصاروخ يا تقع على جدور رقبتك ..
وتقولي اتقدم ازاي ..هقولك اقرأ .. ألجأ لمساعدة نفسيه..اشتغل ..ماتسيبش لنفسك وقت فراغ يخلي دماغك تشتغل وتفتكر الأزمات اللي مريت بيها ..
في ناس بتفتكرها شعارات لما تسمع كلمة أن لو حد خبطك بطوبة جمع كل الطوب واقف عليه واطلع لفوق ...مش شعارات دي حقيقه ..
لا تبكي على الأطلال ولكن اصعد فوقها لتصل للقمه 

#نورهان_شاهين
#أخصائية_علاج_نفسي_و_إكلينيكي