المشهد دا من مسلسل ايجار قديم كانت بتشتكي فيه من طليقها وأسلوبه واللي أدى للطلاق ومعاناتها بعد الطلاق والحقيقه ان مشكله الزوج كانت الاعتمادية وان كان طلباته مجابه بطريقه مبالغ فيها ..لو بصينا للمشهد دا هنشوفه من منظورين ..

المنظور الاول وهي الأم اللي بتربي..اللي ربت أن كل الطلبات مجابه وبالتالي هيطلع شخص متدلع مش قد المسؤوليه وغير قادر على مواجهة الاحباطات لانه متعودش يتقاله لا ومايتبعه من تأثير نفسي واجتماعي على حياته العاطفيه والاجتماعيه والعمليه كمان ..وبنلاقي النوع دا في شخص بيغير مجال شغله بطريقه هيستيريه ومتكرره لانه مابيستحملش التعديل أو الرفض ..فلو انتي أم بتحبي طفلك بجد لازم تدربيه أن الحياه مش كلها سهله وتعوديه على مبدأ مهم اوي في الصحه النفسيه وهو ( ماكل مايتمناه المرء يدركه) يعني مش كل حاجه عايزها لازم تحصل وان في بدائل كتير نرضى بيها

أما بقا المنظور التاني وهي الزوجه أنها خلطت الأدوار..مينفعش أبدا اكون زوجه وداخل في دوري الامومه مع زوجي (انتي مراته مش مامته) الأدوار لما بتتلخبط فانتي بتساعدي شخص اعتمادي أنه ينمي الاعتمادية اكتر وكله على دماغك في الاخر ...بيرسى بيكي المطاف انك شايله بيت وأطفال لوحدك وهو مش بس بيتفرج دا كمان طالب منك تكوني مامته ..ولو لاقدر الله حصل انفصال هيعيش حياته عادي لانه متعودش يتحمل مسؤولية اصلا مانتي ماما بقا شيلي وحبي وسامحي واستحملي ..انتي متعاملتيش من الاول انك زوجه وليكي حقوق عليه والمسؤوليه مشتركه بينكم..

نصيحه للأم ..لو بتحبي ابنك فعلا وخايفه عليه من الدنيا والاحباطات ربي راجل قوي بيتحمل المسؤوليه بانك تشيليه من صغره مسؤوليه ولو بسيطه وبشكل تدريجي ..ومش كل حاجه لازم تكون موجوده لان الحياه الماديه قاسيه لا الفلوس هتيجي منغير تعب ولا طلباته كلها هتكون مجابه

نصيحه للزوجه ( الأدوار) اوعي تلخبطي الأدوار اوعي تشيلي دوره ودورك هتتعبي جدا وتحسي انك بتحاربي الدنيا لوحدك مش بس كدا هيجي وقت وتحسي أنه هو والحياه عليكي بدل ما تكونوا إيد واحده عالدنيا

#نورهان_شاهين

#أخصائية_علاج_نفسي_و_إكلينيكي